திருக்குறள்: கல்வி

திருவள்ளுவர் எழுதிய நூல் திருக்குறள். அதில் 1330 குறள்கள் உள்ளன. ஒவ்வொரு குறளும் ஏழு சொற்களே கொண்டது. ஆனால் அதன் பொருள் மிக ஆழமானது.

கல்வியைப் பற்றி வள்ளுவர் ஓர் அதிகாரமே எழுதியிருக்கிறார். அதில் இரண்டு குறள்களைப் பார்ப்போம்.

கற்க கசடறக் கற்பவை கற்றபின்
நிற்க அதற்குத் தக

பொருள்: கற்க வேண்டியவற்றைக் குற்றமில்லாமல் முழுமையாகக் கற்க வேண்டும். கற்ற பிறகு, அந்தக் கல்விக்கு ஏற்ப வாழ வேண்டும். வெறும் படிப்பு போதாது; படித்ததை வாழ்க்கையில் கடைப்பிடிக்க வேண்டும் என்பது இதன் கருத்து.

எண்ணென்ப ஏனை எழுத்தென்ப இவ்விரண்டும்
கண்ணென்ப வாழும் உயிர்க்கு

பொருள்: எண்ணும் எழுத்தும் ஆகிய இரண்டும் மனிதனுக்குக் கண்கள் போன்றவை. கண் இல்லாதவன் உலகைப் பார்க்க முடியாது; அதுபோல கணக்கும் எழுத்தும் தெரியாதவன் உலகை அறிய முடியாது.

இரண்டாயிரம் ஆண்டுகளுக்கு முன் சொல்லப்பட்ட இந்தக் கருத்துக்கள் இன்றும் உண்மையாக இருக்கின்றன.