பாட்டி சொன்ன கதை

ஒரு நாள் இரவு பாட்டி எனக்கு ஒரு கதை சொன்னார்.

"ஒரு நாய்க்கு ஒரு எலும்புத் துண்டு கிடைத்தது. அது மிகவும் மகிழ்ச்சி அடைந்தது.

அதை வாயில் கவ்விக் கொண்டு வீட்டுக்குப் போனது.

வழியில் ஒரு சிறிய பாலம் இருந்தது. பாலத்தின் கீழே ஆறு ஓடியது.

நாய் தண்ணீரைப் பார்த்தது. தண்ணீரில் இன்னொரு நாய் தெரிந்தது! அந்த நாயின் வாயிலும் ஒரு எலும்பு இருந்தது.

உண்மையில் அது அதன் சொந்த நிழல். ஆனால் நாய்க்கு அது தெரியவில்லை.

'அந்த எலும்பும் எனக்கு வேண்டும்!' என்று நினைத்தது. பேராசை கொண்டது.

அது வாயைத் திறந்து குரைத்தது.

வாயைத் திறந்ததும் அதன் எலும்பு தண்ணீரில் விழுந்துவிட்டது!

இப்போது நாய்க்கு ஒன்றுமே இல்லை."

பாட்டி சொன்னார்: "பேராசை பெரு நஷ்டம்."